نظرية النص كم

لما قريت تدوينة روزا اللى بعنوان يعنى
اتأثرت بيها اوى
و لقيت نفسى بكتب نظرية النص كم
===========
عارف لما تكون لابس فانلة نص كم فى عز البرد
يبقى أسمك لابس حاجة
بس فى نفس الوقت
و لا ليها قيمة مش هتمنع عنك البرد
هى دى نظرية النص كم و اللى معادلتها بتقول
أى حاجة + نص كم = برد
لو اشتغلت وظيفة نص كم ملهاش مستقبل
و لا بتاخد منها وضع اجتماعى و لا مالى محترم
هتعيش فى برد لأنك مش هتعرف تفتح بيت تتدفى فيه
...
لو اتجوزت جوازة نص كم
متجوز علشان يبقى أسمك
اتجوزت زى كل الناس و خلاص
مأختارتش صح و لا فكرت صح
هتعيش فى برد
لأنك مش هتعيش سعيد
و هتهرب على طول من البيت للشوارع فى عز البرد
...
لو كان هدفك فى الحياة نص كم
أربى العيال و أعيش مستور
و لا هتربى العيال و لا هتعيش مستور من البرد
لأن ببساطة طموحك محدود جدا
و اللى طموحه محدود و لا فى يوم طموحه بيكبر و لا بيوصل حتى للمحدود
======
أوعى تفتكر أن الحل لمكافحة فكر النص كم أنك تلبس بالطو
لأ لأن هنعرض قريب نظرية البالطو و هى متقلش خطورة عن النص كم
----------
المهم أوعى تلبس النص كم فى عز البرد و لو اضطريت ابقى خلى فى جيبك قرصين ريفو