Wednesday, August 12, 2009

يالا هدية يا بلاش :)

شفتك بقلبي قبل عيني ما تلاقيك

احساس خطفني وهزني دوبني فيك

شفتك بقلبي قبل عيني ما تلاقيك

احساس خطفني وهزني دوبني فيك

عيشتي الحب الي ياما حلمت بيه

دوقتي العشق الي انا كان نفسي فيه

عيشتي الحب الي ياما حلمت بيه

دوقتي العشق الي انا كان نفسي فيه

يا حلم غايب من سنين اشتقتله

انت اول قلب اقابله احتجتله

غيرتني وغيرت شكل الكون في عيني

احلى هوى عرفوا البشر بينك وبيني

عيشتي الحب الي ياما حلمت بيه

دوقتي العشق الي انا كان نفسي فيه

Labels:

Sunday, February 1, 2009

حبر و رصاص







بكرة بالقلم الرصاص اترسم
بس امبارح بالحبر اتحفر
أرسم و عدل فى بكرة زى ما تحب
و أنقل و امسح و بدل و ألغى و عدل
و أعمل خطوط
و اكتب مشاوير
و ارسم طرق
ده بكرة لسه مجاش
بس امبارح عدى و راح
و أتكتب بالحبر
و لو حد قالك قبل كده
ان الحبر بيتمسح
قله انت كذاب
امبارح اتكتب بالحبر ثابت
بلونه الابيض و الاسود
و حتى الفوشيه
و التريكوااااااااز
و بالوانه الرمادية
و الزهرية
لو شكله مش عاجبك
اقلب ورقتك
و متندمش على اللى فات
ده رسم الحبر و الرصاص
بس ما بالك برسمة النهاردة
اللى لسه فى ايدك
هتطلع ازاى
دلوقتى بايدك القلم و الالوان
ركز بقى علشان تطلع صورة بالالوان
زى ما انت راسمها فى خيالك
بس كمان متنساش ترسم وشوش مبسوطة
فى دنيا متستهلش تكشيره
ارسم فى النهاردة شجر و ورود متفتحة
و طرق طويلة منوره بنور الشمس
و امشى فيها على شط بحر ميته باللون السماوى الفاتح
و ارسم شريكة حياتك بالفستان الابيض بتجرى ناحيتك
و ارسميه بالحصان الابيض لابس ابيض فى ابيض
ارسموا احلامكوا زى ما تحبوا
و متقفوش فى طريقها
أكيد هتوصلوا
بس لو رسمتوا ارسموا بجد

Labels:

Friday, January 9, 2009

حداد و توقف كامل لنشاط المدونة لحين اشعار اخر

Tuesday, December 30, 2008

مش عارف و مش فاهم و احساسى مختلف !!!

2008
مش عارف يمكن قبل يومين بس كان ممكن اقول
اسعد اعوام حياتى
سنة بدأت بتحديد موقفى من التجنيد
و اخدت براءة
و بعدها بأيام قدمت فى شغل فى المحكمة
و مكنتش عارف اتجاهى كان ازاى
قدمت فى شغلى كمان كهزار على النت
بس الهزار قلب جد و لقيت الشركة بتكلمنى علشان اعمل الانترفيو
و رحت الانترفيو و عديته الحمد لله
يمكن كنت بحلم انى اشتغل فى مجال التدريب
لانه من وجهة نظرى مش مجال شغل بس لا ده كمان رسالة
و لقيتنى بعدها بقيت فى عداد المدربين المحترفين و مكانش على بالى خالص ده
بس حسيتها نقطة تحول فى حياتى
بعد كده سافرت استلم الشغل فى السعودية
و هنا لقيت دنيا غير دنيتى
و ألوان كتير من الناس
و جنسيات اكثر
اتعلمت كتير اوى
يمكن حسيت بحنين لايام زمان
و اصحابى و بابايا
و اخواتى
حتى المتسولين اللى كنت بشوفهم فى الشوارع
ملامحهم فى عينى
عملت خطوات كتير فى حياتى
و كمان
اعتمرت كذا مرة
و بقالى متدربين كتير جدا
و ظبطت اللغة
و صاحبت ناس كتير اوى اوى
و اللى مسبب لى السعادة
انى مازلت بعمل نشاط اجتماعى
يمكن اتحولت من محب عادى للسفر لمدمن سفر
و كمان اول مرة اركب طيارة كانت السنة دى
قبل ما تتحول لأكتر وسيلة نقل بستخدمها فى السفر
و يمكن اكون بفضل الله
حطيت رجلى على اول المشوار
فاضل موضوع مسبب لى مشاكل فى حياتى
معرفتش احسمه مع نفسى سنة 2008
ادعولى احسمه فى 2009
يمكن اخر اسبوع فى السنة دى
خلانى مش عارف اكون مبسوط و لا زعلان
احداث غزة التى اصابتنى بحالة مرضية
و ارتفاع دائم فى ضغط الدم
و وصول ندى بنت اختى للدنيا امبارح
اول مرة احس انى مش عارف افرح و احتفل
مش عارف السنة دى كانت سعيدة
يمكن من غير احداث غزة فعلا تكون أجمل سنين عمرى حتى الآن
سنة بسنين طويلة
خبرات و لفيت فيها مدن جديدة
و اتعاملت فيها مع ثقافات كتيرة
وفضلت دلوقتى محتار
انا مبسوط بالسنة اللى فاتت و لا لا
ربنا يعكنن عليكى يا اسرائيل
بس فى الاخر
سلام 2008 بحلوك و مرك
اهلا 2009 باحلامك و ازماتك

Thursday, November 27, 2008

غريبة حواء ....!!!


هناك قول مأثور يقول
إذا أحبتك إمرأة خافت عليك
و إذا احببتها خافت منك
و هذه المقولة صادقة بشكل كبير
فالمرأة عندما تحب
تسعى لارضاء من تحب
و تضحى من أجله
حتى تنول رضاه
أما عندما يصارحها هو بحبه
تتقوقع خوفا منه
و تهرب من مواجهته
و كثيرا تتجاهل مشاعره
هكذا قرأت من دروس الحياة
=====
قول مأثور استفذنى فحبيت نتكلم عنه

Monday, October 27, 2008

نعمة الفساد


نعمة الفساد


متقلقوش لسه متجننتش

الفساد طبعا حاجة وحشة

بس بعد لما تقرأ الموضوع ده هتعرف قد ايه الفساد ده نعمة

الفساد ذكر فى القرآن لفظا و فى كثير من المواضع معنى

قال تعالى (ظَهَرَ الْفَسَادُ فِي الْبَرِّ وَالْبَحْرِ....

حقيقة هل انتشر الفساد فى جميع المجالات

و كافة الاصعدة

هذا ما يعبر عنه الواقع

الفساد الآن فى كل شئ

طعامنا فاسد

شرابنا فاسد

و الامراض دليل وجود هذا الفساد

كل شئ مشروع او غير مشروع يتم بمقابل

و موظفين كتير فاتحين الدرج

حتى الفتاوى بقى فيه مفتين كتير

بيقول كلام غريب يعبر على انهم ميعرفوش قشور أصول الفقه

بس الفساد ده جه لوحده

قال تعالى: (ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ ...

يبقى مرجعيتنا الاولى

بتقول ان الفساد ده بسببنا

و كلمة الناس جاءت معرفة اى عامة

فلو قال تعالى ناس كانت تخص بعض الناس

و لكن التعريف لكلمة الناس يعنى اننا كلنا سبب فى هذا الفساد

و معرف من بداية خلق الكون ان الانسان

قد يكون مصدر الافساد فى الارض

قال تعالى (( وإذ قال ربك إني جاعل في الأرض خليفة قالوا أتجعل فيها من يفسد فيها ويسفك الدماء قال إني أعلم ما لا تعلمون ))

و نعود طيب ربنا يبلونا بالفساد لماذاااااا؟؟؟؟

قال تعالى: (ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ.

قال لعلهم يرجعون

اذن النعمة فى انتشار الفساد

ان نقف مع انفسنا

و نندم على ما فعلنا

و نكافح هذا الفساد

و ايضا فى القرآن قال تعالى (وَلَنُذِيقَنَّهُمْ مِنَ الْعَذَابِ الْأَدْنَى دُونَ الْعَذَابِ الْأَكْبَرِ لَعَلَّهُمْ يَرْجِعُونَ

و كلمة (الأدنى) هنا كما قال العلماء هى مصائب الدنيا وأمراضها.

والفساد هو اكبر مصائب الدنيا

فاذا صلح المجتمع صلح حال الشخص

و اذا صلح الطعام صلحت الصحة

و اذا صلح القلب من الفساد صلح باقى الاعضاء

و لكن هذا هو العذاب الادنى و يذيقناه الله اياه فى الدنيا دون العذاب الاكبر

لعلنا نرجع و نتوابو لكن اذا لم نتب فلنا العذاب الاكبر

و الاية قصد بها الترغيب فى تجنب العذاب الاكبر و مكافحة العذاب الادنى بمكافحة الفساد

بعد كل ذلك فان معنى الايات يوضح عمق ضرورة مكافحة الفساد

و أيضا قدرة الناس على اصلاحه فهم وفق الايات هو السبب فيه

فمن افسد شئ يستطيع اصلاحه

تفتكروا بعد كل ده الفساد مش نعمة ؟؟؟

الفساد نعمة و نقمة

فاذا شاهدناه و صمتنا

فنحن نسير على طريقه

و معنى ذلك فاننا نتظر العذاب الاكبر

و اذا وقفنا امامه فنحن فى نعمة الفساد فسنكافحه و نقضى عليه

وقتها سنكون المصلحين فى الارض الذى قال فيهم الله تعالى

" والذين يمسكون بالكتاب وأقاموا الصلاة إنا لا نضيع أجر المصلحين ".

فكل شئ فى كتاب الله قال تعالى " يا أيها الناس قد جاءتكم موعظة من ربكم وشفاء لما في الصدور وهدى ورحمة للمؤمنين


يبقى الفساد نعمة و لا لأ ؟؟؟؟

Sunday, October 19, 2008

لحن حزين ع انغام سمسمية

رحلة بورسعيدية ع السمسمية
بورسعيد هى الصمود
بورسعيد الكفاح طول الزمن
ضد العدو و ضد الظروف
حتى الفنار
حكموا عليه يتخنق
ورا برج القنال
و لسه شابب
عايز يبص ع السفن
و يشوف صحابه البمبوطية
متشعلقين على الحبال
علشان يبيعوا اى حاجة لضيوف الكنال
و يشوف البحر
و صيادين البكلويز
ينزلوا الميه فى عز النوه
علشان الرزق
لسه الفنار فاضل
شامخ شموخ البورسعيدى
اللى شردته الايام
و الحرب
و دلوقتى تحبسه الظروف فى الهم
عجوز من 56 مش مستنى فلوس
كل اللى عايزه طبطبه و كلمة يا بطل
ولادك ماتوا فدا ايامنا
ع السمسية رغم الظروف
ع الشط قاعد فى الضمة
مواويل زمان
غنيت كمان
غنى يا سمسمية لرصاص البندقية
بس الرصاص كان لوحة فى خيال ابن البلد
بعد حرب و مطحنة
فاكر ان الحياة هتكون ألوان
بعد الضنك
و الهجرة و المجهول
و مطرح متاخدك رجليك
و المشوار مر
رسمها العبيط رصاص
و نسى ان الرصاص لما يبطل ضرب
الكل يفرح و ينسى اللى شال الهم
و من ساعتها
ضمة السمسمية
كل اربع ع نجمتنا
الساعة 9 متتاخرش و لا ثانية
فيها الشجن
و الامل
و الذكريات
و غريب يا شعب
حالك يبكى و برضه بتضحك
و لسه تنكت
و عمال تناكف فى نفسك
و فى غيرك
و حتى الحكومة مبتفلتش
و لا الأهلى و ماتشاته
دى حكاية تانية متتفوتش
ياه ع اكلة شبار
و العشا سيبيا
من عند البرج
او حتى الجزار
فى سوق البالة
عنوانه ميتوهش
و قميص غادة و تشيرت حمادة
و الواد الكن
و بتاع الزلابية
و معدية 2
و بورفؤاد
لما الشتا يغسل طرقها
تقولش باريس فى مجدها
ناس هادية
شوارع نضيفة
نضافة قلوب سكانها
و لا اللسان وقت الغروب
و الدولفنين اللى هناك
بيتنطبوا اهمه و يبلبطوا
تعرف وحشنى ايه كمان
قعدت الطابية
و الصحبة الجميلة
و الحنطور و مستجير
و جيرانى و بيتى
و عربيتى التعبانة
ضهرى وجعنى لما افتكرتها
من كتر الزق
عايز سنارة
طيارة ترجعنى
تعرف
ابويا حكالى
انه زمان كل غارة
كانت البلد تترج
و السماء تقلب ألوان
و المدمرة آيلات
صوتها كأنه زمارة بتخرم ودانك
و كنا نفكر انها ممكن فى لحظة تضرب
بيوتنا و تجيبها الارض
و مع كل ده صمدنا يابنى
و لا سلمنا
و رغم اننا احرار
شالوا المنطقة الحرة
و برضه فضلنا زى ما احنا
يخدوا المنطقة ياضنايا
و يسيبونى الحر
يمكن نحتاجه
لو يوم حاربنا
بابا ان مكسوف من كلمة أبو العربى
اصحابى فى الكليةكلهم بيقولولى ايه
يا أببببا العربى
افخر يابنى انت مش عربى ؟
ايوه ياابه عربى
و ابن عربى؟
و لغتك عربى
و لا غربى؟
طبعا عربى
عارف العرب؟
كان لهم زمان امجاد
ايام مكانش فيها مصر و سودان
و سوريا و لبنان
و خليج و شام
كان اسمها دولة الاسلام
بعدها بقوا اسمهم دول العرب
و دخل بينهم الاحتلال
خلى منهم الايطالى و الاسبانى
و اليونانى و الفرنسى
فرقونا
قطعوا ارحمن
او محدش جمعنا
لحد ما جه جمال
كان راجل همام
يشوفوه الأسود يبقوا فيران
عارف جمال يابنى
محفور فى قلوبنا
علشان كرامته
بحسه بورسعيد حتى النخاع
و مات جمال
وجه السادات
و مات كمان
و فضلت بورسعيد
حكاية متتحكاش فى الكتب
و لا فى حلقات فى تليفزيون عارف ليه ؟؟
لان مش هيعيشها ألا اللى عارف قيمتها
و يا خوفى لنموت قبل ما نحكى كل الحكايات
=========
احساس لبورسعيدى محروم منها



Monday, October 13, 2008

عمتى .. ليست إنسانة

عمتى .. فيفى
كما كنا ندلعها
أعطت الجميع حياتها
و ماتت دون وداع
قصة حياة استثنائية
لإنسانة قد تظلم لو وصفت بالإنسانة فهى بالحق
كالملائكة فى طباعها
كالملائكة فى حب الناس لها
و انتظار زيارتها

فيفى .. تلك المرأة التى لم تتزوج
و تفرغت لرعاية جدتى المريضة
و استمرت فى خدمتها و تلبية كل احتياجاتها
لمدة 9 سنوات
ماتت بعدها جدتى

لقد كنت و اخوتى
بالنسبة لها الاستثناء
كنت أرى السعادة فى عينها
عندما ندخل عليها بيت العائلة
كانت تستمتع و هى تلبى طلباتنا الكثيرة
وقتها بطبيعة عمرنا كأطفال

لقد كانت صديقاتها ينادونها
بأم عمرو
( عمرو ده اخويا التوأم )
من و أحنا صغيرين
بحكم إننا توأم
كانت والدتى تتولى كل امورى
و كانت عمتى تتولى أمور أخى
فقد اختارت رعايته هى
فلذلك كانت تنادى بأم عمرو

ماتت جدتى
و اختارت عمتى ان تحى من أجل رعايتنا
خاصة ان والدتى أيضا كانت وقتها أصبحت جليسة الفراش
جاءت عمتى و تركت بيت العائلة لتقييم معنا اقامة كاملة
كان يومها يبدأ من الصبح حتى المساء
فى تلبية احتياجاتنا
كل تفكيرها أنا و اخوتى
يومها كله لنا
صحتها كلها تفنى من اجلنا
كان ذلك بالنسبة لها ترفيهها و متعتها الوحيدة فى الدنيا

إلى أن جاء يوم 12 أكتوبر 2001
كان يوم جمعة اذكر التاريخ الهجرى أيضا 26 رجب
ليلة الاسراء و المعراج
و كنا كعادتنا فى ذلك اليوم صائمين
قرر والدى دعوة عمى أحمد و أسرته للتناول الإفطار معنا
فالعائلة كلها تصوم هذا اليوم
كان يوم سعيد للغاية
كنا نضحك من قلوبنا
و نمزح و صوت ضحكاتنا يجلل فى أرجاء بيتنا المتسع
كانت والدتى أيضا على قيد الحياة
كان اخوتى جميعهم مازالوا فى بيت الأسرة قبل زواجهم
لم اضحك بعد هذا اليوم كما كنت اضحك قبله
عمتى فى هذا اليوم و قد كان اقرب أحبابها إلى قلبها مجتمعين
لوداعها دون أن يدروا
أن الوداع قريب
لاحظت يومها إنها على غير عادتها
كانت نظراتها مشتتة
كلماتها قليلة جدا
لقد كانت بشعر بقرب الرحيل

قبل فجر يوم 13 أكتوبر 2001 أو 27 رجب
جلست للتحدث مع أبى فى أمور كثيرة جدا
و نامت بعد صلاة الفجر
و استيقظت تعانى من هبوط بسيط
كان ذلك قبل صلاة الظهر
بساعة تقريبا
اختى الكبرى ذهبت لعملها كصيدلانية
تحدث إليها باننى و اخى ذاهبين لمتابعة أحوال
السايبر نت
الذى كنا نمتلكه وقتها أنا و اخى
و نصلى الظهر و نعود
فلن نجلس اليوم فى السايبر سنجلس معها

لم أكن أعلم اننى لن أودعها
فقد ذهبت على السايبر
و جائنا تليفون من البيت
بضرورة العودة فى الحال
لقد عدت و لكن
وقتها كان كل شئ انتهى
لقد ماتت دون وداع
مع اذان الظهر
ماتت فى صمت
ماتت و هى تفكر فى أمورنا
تركت فى قلبى جذور
لأنبل نموذج للوفاء و التضحية و الإيثار
إنها ليست إنسانة
إنها نموذج حقيقى لملاك بجسد بشر
ستبقى خالدة فى ذاكرة عائلتى للأبد
و قصة فخر يفتخر بها ابنائى انك عمتى
انحنى أمام تلك الإنسانة النادرة التكرار
انحناءة تضاؤل أمام عظمتها
و دعواتى الدائمة لها بالرحمة و رفع الدرجات

وحشتينى جدا يا فيفى

حبيبك نمنم

Labels:

Saturday, October 11, 2008

مصر بتاعتنا و مصر بتاعتهم !!!

مصر بتاعتنا
مصر بتاعتهم
امبارح و أثناء تجولى فى مدونات اصدقائى استوقفنى بوست للناشطة الاجتماعية العزيزة نجوان
كانت تتحدث عن رغبتها فى أن تكون مصر كما تتمنى هى ليس كما اصبحت علية الآن
رغم قلة كلمات البوست إلا انه جعلنى افكر ساعات كثيرة فى جمله البسيطة السلسة
فقد تكون البوست لاسئلة احاول الجواب عنها خلال تلك المشاركة
- ليه مصر بتاعتنا مش بتحقق و مصر بتاعتهم حقيقة عايشنها كلنا ؟
- ليه مصر بتاعتنا عايشة جوانا بس ؟؟
و بعد تفكير عميق
توصلت لتلك الاجابات
مصر بتاعتهم واقع و حقيقة علشان هما يملكوا قرار انهم يحولوا احلامهم لواقع
و دايما احلام الشياطين كوابيس للبشر
من هنا قادتنا احلام المهيمنين و الفاسدين الشيطانية لما نحن عليه الآن فى مصر
من فساد على كافة الاصعدة
فى حين لو فكر كل حد فينا فى ايه احلامه لمصر و فكر فى مصر بتاعته هيلاقى فيها الخير و العدل و الشرف و الحب
و مع ذلك برغم نبل تفكير كل اللى بيفكروا و عندهم صور جواهم لمصر بتاعتهم إلا انهم مش بيوصلوا لنتيجة
و علشان كده كان الاستغراب ... ليه احلام الاغلبية مش بتحقق و احلام الاقلية هى اللى بتقود مسيرة ملايين ؟
ببساطة لأننا مش بنعبر عنها .. مش بنقاتل علشان نحققها
ممكن نقاتل علشان نتجوز حد بنحبه
ممكن نقاتل علشان نشترى شقة
ممكن نقاتل علشان نشتغل شغل كويس
بس مش بنقاتل علشان نعمل مصر اللى فى خيالنا
هل احنا مش صادقين فى احلامنا دى ؟
هل مصر مش فى اهتمامتنا ؟
ياترى ليه مصر عايشة جوانا بس ؟
متهيقلى ان الاسباب
1- بنخاف منهم لان مصر بتاعتهم مفيهاش و لا احنا و لا مصرنا فخايفين ليمسحوا حتى احتمالات وجودنا
2- كل واحد فينا مش شايف ألا مصر بتاعته و فاكر انه الوحيد صاحب الحلم ده
3- لأننا سلبيين اى مصر نعيش فيها و خلاص بتاعتنا بتاعتهم انشاله حتى بتاعت البتاع
و الحل اننا لازم نعبر عن مصر بتاعتنا بصوت عالى و نحلمها بصوت عالى
و نحط صورة مصر بتاعتى على مصر بتاعتك على مصر بتاعته
و نحاول نعملها واقع
و نخلص بقى من حبستنا فى مصر بتاعتهم
و علشان البوست يكون له هدف
عندى ليكوا سؤالين
ياترى مصر بتاعتك شكلها ايه ؟
تفتكر مصر بتاعتك مش بتحقق على ارض الواقع ليه
؟
اهلا بكل الاراء حتى لو كانت مصر بتاعتك هى مصر بتاعتهم .....
جودة :)




Saturday, October 4, 2008

من رحلات الرحالة ابن جودة


طبعا كلكم سمعتوا عن رحلات ابن بطوطة و ابن ماجد
بس خلال الفترة ظهر رحالة جديد اسمه ابن جودة
اعتاد الرحالة الجديد القيام برحلات غير تقليدية و له استكشافات غير طبيعية

نصحبه فى رحلة من نوع خاص كما يرويها فى كتابه رحلات
ابن جودة

فى رحلة استكشاف قلبك
قابلت وحوش بداخله و حراس شداد
منعونى من الدخول
نصبوا أمامى المتاريس
قاومت
كافحت
قاتلت
و جرحت
و تخفيت أحيانا
و لكننى لم استسلم
واصلت طريقى مارا من دهاليز قلبك إلى الداخل
مشيت فى طريق طويل لونه ابيض من نقاء قلبك
بين جنائن خضراء من براءتك
بها ورودا اعتقد أنها طفولتك
و نجوم تتلألأ فى سماء قلبك
كفلاشات كاميرات تصور نجم متألق
تنقل صورة لانطلاقك و حيويتك
سرت كثيرا أظنها مسيرة عامين
و لكننى تمنيت ألا ينتهى الطريق إلى الأبد
و مازلت فى رحلتى الاستكشافية
إذ يفاجئنى سد أسود طويل
يتوسط جبل عظيم من كبريائك و تمردك
مكتوب على السد بلغة بيزنطية عريقة
لن يستطيع إكمال هذا الطريق
إلا المختارين
وقتها علمت انك المتحكمة فى كل الأمور
و لكنى مازلت احلم بالمرور
لأكمل رحلتى الشيقة
التى طالما حلمت بها
وقفت أفكر
لأول مرة فى حياتى أشعر اننى عاجز عن المضى فى طريق اخترته
رغم خوفى من كونى أول من سلكه
فقد بدأت رحلتى بقتال شرس
سلكت طريق طويل
أينعم كان ممتعا وسط نقائك و طفولتك و براءتك
تسألت هل سأستطيع أن أكمل رحلتى
أم سيكتب لى الموت على يد حراس قلبك
جلست فى وسط الطريق مشتتا
و تذكرت من بيده ملكوت كل شئ
وقتها تذكرت أن الله لو أرد أمر فيقول له كن فيكون
وقتها شعرت أن الله قد يكرمنى و يزيل من امامى سدك الأسود
و ظللت اردد
اللهم أنت عضدى
و أنت نصيرى
بك أحول
و بك أصول
و بك أقاتل
فأكتب لى المرور
و اكتب لى السعادة
و أزل من أمامى تلك السدود
و اجعلني أكمل أجمل رحلاتى

==================================
و أسدل الستار عن جزء من رحلة لم اقرأ فى كتاب هذا الرحالة إلى الآن
كيف انتهت قصة تلك الرحلة الشيقة
: ))

Labels:



Get my banner code or create your own banner