أعقل واحد فى مصر

بقالى اسبوع حاسس انى ممكن أبقى زى ده
و فيه ناس قالولى انى بقيت خلاص
.....

المهم من يومين

مصر كلها اجمعت على عدم مذاكرتى

هتقولولى ازاى

افتح الباب الاقى ضيوف

افتح المطبخ ألاقى اكل عايز يتاكل

افتح التليفزيون الاقى الاهلى و الزمالك

افتح الراديو يطلعلى المرحوم عبدالحليم يقولى طريقك مسدود مسدود ياولدى

افتح الكمبيوتر الاقى بورسعيد اون لاين

افتح الموبيل الاقى مزدات و رسايل كول ميى باك

افتح الكتاب تطلعلى روتانا سينما

تقولى مش هتقدر تغمض عينيك

اقول لا مبدهاش لازم اذاكر

اعمل نسكافيه

يالا ذاكر بقى

اكلت و نتيت و شاتيت و نسكافيتيت

ناقص ايه

افتح الكتاب الأقيه مكتوب بالهندى

ايوه هندى

متقولوش ازاى

هو يبدو عربى بس الاحساس اللى وصلنى هندى

حتى اميتابت شان كان فى صفحة 735 واقف أهو

المهم تذكرت مقولات العظماء

نابليون قال مفيش فايدة

هتلر قال لأ

و جمال مبارك قال نعم

و أنا بقول نعمين

نعم النية موجودة و نعم الرغبة فى المذاكرة

ميه فل و تسعتاشر

====

اكلم الرفيق نوفاوش يقولى

أنت خلاص فيوزاتك خلاص

هتقولولى قالى كده ليه

مع ان كلامى اللى قبل كده

كله عين العقل

قلبه اسود نوفاوش مش كده

بقوله

صاحى الصبح بدور على طلعت مش لاقيه خالص

اكتر من ساعة بدور و مش باين له اثر

بس عاشور ابن حلال بيسمع الكلام

يسألنى و براءة الأطفال فى كيبورده

مين دول ؟

اقوله فيه حد ميعرفش طلعت و عاشور ؟

ده انت ثقافتك متواضعة اوى ى ى

طبعا مش هاقولكوا هما مين

ألا فى أخر البوست

المهم طلعت شقى و مش بيقعد فى مكان

و مدوخنى وراه صغنن بقى نعمل ايه

المهم النهاردة طلعت مسك فى عاشور

و رحت خلصت بينهم

شقاوة شقاوة هيجنونى

المهم معلومة تاريخية

أكتب يا تاريخ

طالب الحقوق أيام الامتحانات

عنده شعرة ساعة تروح و 23 ساعة بتيجى

ده نداء للأهل بمراعاة النقطة دى

طالب حقوقى .. لاجناح عليه

و على فكرة ليهم الجنة

====

الرفيق نوفاوش

ده اكيد عرفتوه من روسيا الكفر

طلعت و عاشور

كتب المادة الأولى

طلعت الصغير 550 صفحة بس

عاشور 800 صفحة بس

يعنى لسه مراهق :) برضه

كل ده شايله فى قلبى وساكت

و الظالم بيقول

أن فيوزاتى ضربت

دى هزار طبعا لاننا باذن الله هنذاكر و هننجح

و برغم انى حاسس ان مخى ضرب شويتين

بس عارف انها فترة و هتعدى

ادعولى بجد

وحشتونى جدا

رسالة خاصة على الهامش لنور اللى أنا خالها

هتوصل مصر باذن الله الأحد 27 مايو

دى فترة و هتعدى يا حبيبتى

خالك أعقل واحد فى مصر

هههههههههههه

و مش عايز اسمع كلمة

يا عينى على الشباب و اللى بيجراله

لانه اللى بيجرا لينا كتير

هنصيف سوا

بحرى مغلق

و ذلك للاعداد للموسم الصيفى

الذى يبدأ فى بحرى

يوم 15 يونيو

مع وعد بمفاجأة كثيرة

وشاطئ ظريف

و صيف لذيذ

و راحة نفسية لكل رواد شاطئ بحرى

مدونات ليست لمجرد التدوين

فى حياتى حاجات كتير عايز أقولها

بس محتاجة اللى يسمعها

و اللى يأخد بيها

و اللى ينتقدها

اقدر أقول انى كونت رؤية سياسية كاملة

و أراء فكرية حول الاصلاح علشان كده هعبر عن كل اللى بفكر

فيه بـدماغى

و كمان عندى محاولات وشويه اجتهادات لتكوين الاسر السعيدة

اللى يقينى بالله انى هكون صاحب أسرة منهم إن شاء الله

و ربنا يكرمنا كلنا بجوازة كده

كلها سعادة و طاعة لربنا

دول فكرتين شايف فيهم طاعة لربى انى انور اخواتى

و اقولهم أفكارى فى اهم نقطتين ممكن يكون بيشغلوا فكر الشباب

الزواج و المستقبل

و يارب أقدر انفعكم باى حاجة

و يارب أكون عند حسن ظنكم

على الهامش

احلم لافكارى ان تختلط بكرات دماء مقتنعيها فتسرى

فى حياتهم مسيرة الدماء فى الشرايين

و تنبض عليهم نبضات السعادة

و يبقى الحلم فى ايديكم

و بكم يتحقق أو يموت

حياة سليمة أو الرحيل

و تبقى يا بحرى

صورة صادقة تنقل بصدق الاحاسيس

لتحكى قصة أنسان كالبحر

لا يعلم مداه ألا الله

و السلام ختام