أنا و جيرارد و قلب الأم

الخميس اللى قبل اللى فات وصل زميلى الجديد جيرارد المملكة
فى أول خروج ليه خارج الفلبين
أول لقاء كان صباح يوم السبت
الساعة 8 ألا ربع يعنى قبل ما افتح عنيا اصلا
لقيته منتظرنى علشان يروح معايا الشغل


بدأنا نتعرف على بعض
هو مستغرب كل حاجة فى السعودية
مستغرب ان الستات بتمشى مغطية وشها

بس تفتكروا أول سؤال سالهولى ايه !!!


عندك جيرل فريند ههههههههه
كنت عايز اقوله كان بودى يا اخويا بس مكانش يتعز

قال جيرل فريند قال هههههههه

اول سؤال لما بنى ادم يعرف بنى ادم يقوله عندك جيرل فريند

و الأغرب إنى الرد جه لا الاسلام مش بيسمح بان الواحد يكون عنده جيرل فريند

قالى امال لما شاب يحب بنت يعمل ايه ؟ ههههه ( عليك كلام يا واد يا جيرارد )

طبعا بيتقدم و يتجوزها
ناس ليها الجيرل فريند و ناس يطلع عنيها علشان يرضوكوا

يا بنات مصر
طيب ليه لازم لم يحب بنت يتجوزها

علشان الدين بتاعنا بيحافظ لكل ابن ان يكون معروف باباه و مامته قدام الناس كلهم
و ميكونش فى حد مجهول النسب

اكتشفت انه يا ضنايا مفتقد الجيرل فريند بتاعته جدا

صعب على اوى و كانت الدمعة هتنط من عينيا بس لحقتها

المهم هديته و قولتله انه جاى لهدف و اكيد الهدف ده كويس ليه و لازم يكون متقبل فراق احبابه
بس الواد من وقتها زى ما يكون لقى هدية زى ضلى دلوقتى

كل لما اقعد على جهازى فى الشركة يجى يقعد جنبى و يبدأ يتكلم
هو رغاى بس عسول يعنى متزهقش من الكلام معاه

و يقولى ممكن اقعد على جهازك شويه علشان ابعت ايميل للجيرل فريند بتاعتى اطمنها عليا
طبعا قمت و سيبتله الجهاز
تانى يوم طلب نفس الطلب بس المرة دى علشان يبعت لها صوره فى المملكة

طبعا زهقت من كتر الصور اللى شفته له هو و هى

( بس بصراحة يا شباب البت تستاهل يفتقدها )
ده أنا شخصيا بدأت افتقدها هههههههه

المهم الواد بيقولى انت حنين اوى و طيب جدا و مقابلتش حد زيك فى حياتى

( اشتغلنا يا جدعان خرجنا عن حدود القطر المصرى .. الشعاع شغال )
و بيكمل الكارثة و كنا شلة قاعدين مع بعض

( تعرف يا جودة انت لو ماشى فى الفلبين كان الستات تتجنن عليك و تحضنك )

يا كسوفى

البنات فى الفلبين بيحبوا الراجل اللى فى طباعك ........ طا طا طا

علامة اسبهلال عجيبة من هما بتوع قلب الحاجب و فتح البق بغباء

ده انا مفيش صندل فى مصر بصلى يا اهبل

احنا هنلاقى رزقنا فى الفلبين و لا ايه

كملت بقى يوم الجمعة و أنا نايم فى امان الله الساعة 3 الفجر
اذ افوجأ ان مستر رون مديرى بيتصل بيا
استغرب جدا و لقيته بيقولى
الحق جيرارد مش عارف يدخل السكن نسى الباسورد بتاع الباب ههههههه
نزلت لقيته بيتكلم مع الحارس واحد بيتكلم عربى بس و التانى انجليزى بس
و كان لازم يجى حد يتكلم اللغتين نزلت صفرت انهيت المباراة
و اخدت جيرارد و دخلته السكن
و هو كانت اعصابه تعبانة
بيقولى انا من غيرك هنا مكنتش اعرف أعيش

أنت بالنسبة لى هنا الحماية و الامان أنت هنا اسرتى

بيلعب على الوتر الحساس الصايع

عرف انى قلبى قلب خصاية

.. بجد ألف شكر
شكرا يارب انك خلاتنى أقابله

طبعا كنت هعيط بس صمدت

صمود بورسعيد 56

و طبعا لسه فيه يوميات كتير الظاهر مع جيرارد صديقى و اخرة صبرى
( على فكرة جيرارد 31.5 سنة )

قلب الأم بقى نعمل ايه ؟

بس اول حاجة علمتهاله فى اللغة العربية انه يقول طيب

ع الهامش

:)اشمعنى قرينى أنا اللى يطلع فلبينى

الراشد مول - المدينة المنورة

مع عودتى للمدونة هديتى ليكم