بنى ادم فى الغسالة

الغربة غسالة
دوارة لفافة
تلف أيامك
تخلى سبتك تلات
و اكتوبر يناير

الغربة غسالة
دوارة لفافة
بتلف فى دماغك
افراحك و احلامك
سنين كمان بتلف
من كى جى 2 للأمس
و كلام فاضى و كلام مليان
و حب استنيته يرضى و هى مرضتش
و صحبة خير فى الخير اتصاحبوا
و عليه بيفترقوا
و ضحكة من جوه قلبى طالعة
مسمعتهاش من مدة
و اصحاب عمر مستنيى اشوفهم
لو تبطلى لف و لو لحظة
و لحظة صفاء على بحر
محروم منه
ده أنا فى غسالة من غير ميه

الغربة غسالة
دوارة لفافة
بتلف بعمرى
ياتخده يااخده
و الحرب بينا اهى دايرة
متدوس استوب يابنى
وقفها و نزلنى
يمكن تريحنى



الغربة غسالة
دوارة لفافة
بتلف و تقلب وشوشكوا قدامى
ملامحكوا وحشانى
ضحتكوا وحشانى
و كلامكوا فى ودانى

الغربة غسالة
دوارة لفافة
بتلف و تقلب فى مواجع حاولت انساها
لحظة فراق فاتت
و قصة حب ماتت
و ورقة فى كشكولى
اتقطعت قبل كلامى
و النظرة هى الدوا
و الكلمة تبقى الشفاء
و لمتكوا شبابى
و البعد شيخوخة ايامى
و الحضن بلدى
و السعادة سكوت وقت لما تعوز
مش صمت لان مش لاقى كلامتى
و الذكريات رنة موبيلى من حد قاعد جوه قلبى

الغربة غسالة
دوارة لفافة
بتلف و نلف
و الأيام بتلف
و التايمر فى أدينا
و يارب منطولش

رجاء لكل من يقرأ هذا البوست
من فضلك دوس استوب على الغسالة قبل ما تدخل كومنت
علشان متغرقش مدونتى