سورساتك = سورساته

لولولولى

زغرتى يا بت

زغرت يا واد

البت جالها عريس

يا ام سوسو ... عريس كويس ؟

أيوه يااختى بسم الله ماشاء الله

عنده شقه 9 مطارح و عفشة مايه

و عربية مازدا و شعره سايح يا اختى

و قمر شبه أحمد عز

( واد ملزق يعنى :) )

لولولولى

زغرتى يابت

ارقص ياواد

الواد خطب

ياأم سحس .. عروسة كويسة ؟

أيوه يا اختى .. عروسة زى القمر

حلاوة ايه و جسم ايه

و بياض ايه

و عنيها تريكواز كمان :)

سمعتوا الحوارات دى قبل كده او زيها

بس بتحمل نفس المعنى

سامعكوا بتقولوا آه كلكم

المادية دلوقتى بتحكم كل حاجة

المادية طغت على روحانية الزواج

المادة للأسف للأسف طغت على الدين

كله بيفكر فى شكلها فى شكله فى معاه كام

كل الكلام ده مهم بس مستحيل يكون بيشغل اهم حيز فى تفكير كل الناس

الواد .. زكيبة فلوس

البنت ... تابلو حلو

طيب الزكيبة فضيت ... التايلوه باظ او اخدت على شكله

ايه العمل

الحياة باظت !!!

كتير من الجوازات اللى بتحصل على المقاييس دى .. بتنتهى على أيه .. يا الخطوبة تتفركش

يا يتجوزوا و يفاجئوا بالحقيقة

أنت مين ؟

أنتى مين ؟

ما خلاص كل كلام الافلام العربى الحمضانة راحوا ايام الخطوبة و كانهم معرفوش بعض قبل كده

( على فكرة الحب لما يكون من جوه اوى بيوصل من غير الافلام دى ..

عيشه زى ما انت حاسه من غير ما تزوقه و هو هيوصل

لان صدق المشاعر ..

مفيش رسالة بتوصل اسرع من رسالة المشاعر لما تكون صادقة

أقول حاجة :

الشرع حط ضوابط لكل حاجة

و احنا كمسلمين المفروض طبعا مش اللى بيحصل

اننا نلتزم بتعاليم الاسلام فى كل الامور

و طبعا من الامور دى الزواج لان ده اساس الاسرة اللى بتكون المجمتع المسلم

مش كلام تعبير لو صلح اختيار شريك الحياة صلح حال الاسرة صلح المجتمع ككل

فيه شاب بيخطب بنت حلوة علشان يتمنظر بيها قدام معارفه

فيه بنات بتوافق على الشاب لمجرد انه وسيم

فيه شباب بتبهر البنت و بيستعجل و يرتبط بيها و بعد كده يقول ايه اللى انا عملته ده

فيه اتنين بيرتبطوا لمجرد الرضا بالظروف

فيه اتنين بيرتبطوا لمجرد التعود بس مش اكتر

فيه شباب بيسعى انه يرتبط علشان لمجرد انه عارف انه لما يتجوز يبقى كمل نص دينه فاهله بيختاروا و الشخصيات ميركبوش على بعض

فمش بيكمل نص دينه ده ممكن كمان يحصل نصه التانى

فيه بنات بتوفق على شاب لمجرد انه يحسسها انه رومانسى او بتاع سيربريس

و انتوا عارفين البنات بتموت فى السيربريس اوى

و بعد كده بتاخد المقلب :)

أنت حد من دول ؟

انتى من دول ؟

انا مش هقول قال الله و رسوله بالشكل التقليدى

فى الشرع فيه مقاييس اسمها راى العقل

و الشرع كل احكامه مفسره

هقوله ان

البنت فى الشرع مش التابلوه الحلو اللى بيشد اى شاب

ميغمض عنيه عن العيوب و يقول هى دى هى دى

وجدتوهههههههههههههها

و تمشى الامور و مقياس الشكل شاده

و الاصعب انه يكون برضه فيه ميزة شاده البنت و مخليها مغمضه عينها عن عيوبه

دى كارثة مشتركة بيدفع تمنها هما الاتنين و احنا كلنا معاهم ( ما احنا المجتمع )

ده الشكل

بس الشرع قالك الجمال

اختار الجمال و ماله بس مش المعيار الوحيد

فيه الأصل الطيب

و الاخلاق و الدين

و الشروط دى طبعا الشرع حط الدين فى المقدمة

عارفين ليه ؟؟؟

نتكلم عن الشاب الاول

الشرع حط للشاب

الاخلاق و الدين

يبقى الشرع اتفق فيه شروط الشاب و البنت ايه

الدين و الاخلاق

ليه بقى

لان الدين يضمن التقوى

و مفيش اجمل من الصفة دى

التقوى

ان الزوج يتقى الله فى نفسه و فى زوجته

و الزوجة تتقى الله فى نفسها و زوجها

الاخلاق

انتوا عارفين ان الاخلاق

بتعمل الاحترام المتبادل و الرقة و حسن المعاملة و العشرة

زمان كنت اسمع الستات الكبار

لما تتكلم عن جوزها

تقول

اللى يرحمه مشفتش منه الا كل خير

ياه يجتمع الدين و الاخلاق

يبقى ايه الدين بيرقق القلوب

و الاخلاق بتحسن اللسان

يبقى قلوب رقيقة و لسان عذب

( فيه خير اكتر من كده )

دول اساسيات لا خلاف فيهم

بس احسنوا انكوا تشوفوا الاخلاق و الدين بالشكل الصحيح

و دول ليه نماذج اختبارات :)

لان المظاهر بتخدع

نيجى بقى لأيه

زمانكم بتقولوا الواد ده عايزنا

نتجوز على الدين و الاخلاق بس

لا فيه حاجات تانية لازم تكون موجودة

هقول رأيى

فى حوار كان بينى و بين هانى صاحبى

الشيخ الشعراوى كان بيقول ان

مجموع كل انسان = مجموع أى انسان تانى

يعنى مجموع أنا = مجموع أنت

اه ربنا العدل و المعادلة دى صح 100 %

نقولها بشكل اسهل

السورسات اللى عندك = اللى عند غيرك

شاب :

20% أخلاق

10 % جمال

30 % عقل

10 % حب و اخلاص

30 % دين

بنت

20% حكمة

20% أخلاق

20% دين

20 % جمال

20 % ذكاء

لو شاب بالمواصفات دى اتعرف على بنت بالمواصفات دى

يبقى السورسات الاساسية متوافقة

طيب لكل انسان مزايا و عيوب

و حاجات انت حابب تشوفها فى شريك حياتك

و حاجات عايز متكونش فيه

احنا قولنا ان توتل سورساتك = توتل سورسات غيرك

و بأيد تعمل سيت اب لاى سورس عندك و انستيل برضه لأى عيب

و انت بذكائك و بحكمتك ممكن تعمل سيت اب لاى حاجة

انت عايزها فى اللى سورساته الاساسية متوافقة معاك

مادامت الاساسيات موجودة سيت اب لأى حاجة زيادة انت عايزها

و انستول لاى حاجة انت مش عايزة

و الله يا جماعة ربنا ادالنا اللى يريحنا فى حياتنا

و متنسوش قوله صلى الله عليه و سلم ( تركت فيكم ما إن تمسكتم به لن تضلوا بعدى كتاب الله و سنتى )

بس متنسوش النية

( ابتغاء مرضاة الله )

ده رأي شخصى لو عجبك متنسانيش من الدعاء