ساعات من عمرى

الصورة دى على كورنيش بورسعيد

طبعا الصورة قديمة لان الكورنيش

بقى أشيك من كده

بكتيييير

المهم طلبت معانا خروج

مين معانا

أنا و نوفا و تفاصيل

و دكتور زيفاجو

و كان معانا فى أول الخروجة

على حسن

و انهاها معنا المصرى

مدير بورسعيد أونلاين

تفاصيل الرحلة

------

على حسن يقف امام نادى العاشر

بيعيط حيث لا يوجد أحد من أعضاء بورسعيد اون لاين

راح التجمع

و فجأة ظهر عضو فى المنتدى

و معاه العربية بتاعته

و فيها تليفزيون عملاق

بتاع عوشر بوصه كده

و قعد يتفرج على ماتش الأهلى و صن داوينز

و على فكرة نسيت اقولكوا ان على حسن رئيس رابطة مشجعى

صن داوينز فى بورسعيد

المهم و هو مركز فى المشاهدة جدا

جاله ميزد كول من العبدلله

نزل يدور عليا

لقانى فى طريقى لمكان من اماكن التأمل بتاعتى

وراء النادى

و المطل مباشرة على ميناء شرق التفريعة

و الفاصل بينهم حاجز مائى

اذهب هناك حيث يأخدنى الخيال و الاحلام

و ارى بعينى الضفة الاخرى من بورفؤاد دبى المصرية

مليئة بالابراج بديعة التصميم و التنفيذ

المهم منعنى من رحلتى المعتادة

إلى هذه الاحلام

هذا النداء : جووووودة

أنت رايح فين

لاجد على حسن ينادينى من امام السيارة

اللى فيها التليفزيون العملاق هههه

و فى سرى طبعا قولت مش وقتك خالص

( مش تزعل يا على ههههههه )

المهم دخلت قعدت فى العربية مع على و صديقنا الأخر

طبعا على كان مبسوط جدا ان الاهلى متعادل

المهم سألنى امال الناس فين ؟

قولتله مش تعرف مش أنا كنسلت و بلغت الاغلبية ان مفيش تجمع النهاردة

هههههههه

و بعد نظرة غيظ رأيتها فى عينه

طبعا الراجل نازل من بورسعيد لبورفؤاد

متحرك من قارة لقارة على الفاضى

اضايقت من نفسى طبعا

لانى اللى نزلته

دماغى اشتغلت قولت طيب أعمل ايه

مش ينفع اخلى الواد ينزل بورسعيد تانى لوحده

المهم كلمنى تفاصيل و قالى انه مش هينزل بورفؤاد بس عايز يشوفنا

الموضوع كبر فى دماغى اكتر

طيب و انا كمان بقالى كام يوم مشوفتش نوفا و مش متعود على كده

المهم حصل الاتصال ده

الو : ازيك يا واد يا نوفا

الو ازيك يا جودة

واد انت صوتك متغير كده ليه

انت صاحى من النوم

اه لسه صاحى من شويه

ازاى انت مش بتشوف ماتش الاهلى ؟

لا هقوم اشوفه اهو

طيب انت نظام ايه النهاردة ؟

نص ساعة كده و نشوف انت فين ؟

انا و على حسن عند العاشر

و مفيش حد موجود

بس بفكر نخرج بورسعيد

ماشى مفيش مشاكل خلاص نتكلم كمان نص ساعة

و خلصت المكالمة على كده

الصديق اللى معاه العربية ام تليفزيون بشاشة عملاقة عنده

شغل الساعة 8 قمنا استاذنه منه علشان يروح شغله

المهم قولت لعلى تعالى نروح نكمل الماتش

فى كافتيريا

كان عايز ياكل سعادته

عايز كافتيريا بتقدم اكل

فاكر نفسه ع الطرح

ههههه

الكافتيريا هى القهوة بس شيك شويه

و ديته اشيك كافتيريا فى بورفؤاد

نور جراند كافيه

المهم دخلنا الكافتيريا

لقيناها متقسمة جزئين على تليفزيونين

حسيت انى دخلت الاستاد

ناس بتشجع الاهلى و ناس مش عايزة الاهلى يكسب

المهم على بيتبسط زيادة و الأهلى فى أزمة

يبدأ الشوط التانى و الوقت بيعدى

و على بيفرح اكتر

و بعدين معاه المهم لقيته بيقول

ياه لو صن داوينز يخطف جون دلوقتى

الماتش يحلو

المهم و هو بيقول الكلمة قام الاهلى مدخل الجون الأول

هههههه

الناس اللى فى مدرجات الاهلى فى القهوة صفقوا

و هو متغاط جدا جدا

المهم المدرج اللى انا قاعد فيه ساكت هههه

خير يا جماعة هو المصرى اللى مهزوم

المهم الاهلى بيقدم كورة و المستوى بيعلى

ابوتريكة جاب الجون التانى

قامت الاغلبية مبسوطة بالهدف اهلوية و مش اهلاوية

اصلى الناس فى بورسعيد بتحب الكورة اوى اوى

على بدأ يتخنق دلوقتى افتكر ان عنده ميعاد فى بورسعيد

ههههههه

ده الميعاد الساعة 9 و الساعة دلوقتى 9

قولتله طيب استنى اشوف نظام نوفا علشان

لو هننزل بورسعيد ننزل سوا

كلمت نوفا قالى تماموز

قولتله طيب 5 و هنكون عندك

و انا ماشى مع على طلبت معاه طلب غريب

عايز ياكل فطيرمشلتت

المهم جبنا و رحنا لنوفا

و جاب اللنش بتاعه و بدأت الرحلة

ركنا اللنش عند المعدية

و قولنا ننزل مشى

بداية الرحلة الفعلية

=====

يالا نلحق المعدية دى

احنا لسه بعيد

المهم لا يالا نلحقها علشان

على عنده ميعاد

و هوبه يالا

و جريننننننننننننننننننننننننننننا

و لحقناها

و بعد بدء الرحلة بمؤشرات خير الله ما اجعله خير

نزلنا لقينا تفاصيل واقف هو و زيفاجو فى انتظارنا عند الفريبور

يالا يا جماعة نعيش اللحظة

بدأنا نتحرك على حسن قالى انا هروح اجتماع الموقع بتاعى

الموقع ده هو عشاق النادى المصرى

مشيت أنا و على تفاصيل

و نوفا و زيفاجو جنب الممشى السياحى

و قعدنا نتكلم و نهزر و نغلس على بعض

طبعا نغلس ده على الالفى و انا موجودين

و طلبت معانا نطلع الممشى نتمشى عليه

على الالفى ساند عليا انا و نوفا

و كلنا عارفين قد ايه على صغنن الحجم

المهم انا استحمل طيب الواد نوفا الغلبان

المهم طلعنا

و اتمشينا هناك

المنظر من فوق مبهر

الممشى و القناة و الاضواء معكوسة على المياه

و فيه لانشات صغيرة واقفة

بحب شكل اللانشات اوى اوى

و كان فيه يخت تحفة

ياختى عليه

و خلصنا الممشى و احنا نازلين

نفس المعاناة بتاعت و احنا طالعين

أنا و نوفا

نزلنااااااااا

و بقينا قدام حجر ديلسيبس

و مشينا عليه

أحلى حاجة فيه

انك بتشم ريحة الأصالة

بتاعت بورسعيد فى الحجر

و توصل لاخره حيث قاعدة التمثال

بلا تمثال

المهم و احنا بننزل سلمه

بيشدنى شكل عربية الترمس

و الدرة و الفشار

و تفاصيل قال انه لو مشافش الحاجات دى و لو مكانش شم

ريحة الدرة مكانش حس انه جه ديلسيبس

فعلا عندك حق يا علوة

طلعنا بعدها ع الطرح

الجو كان جو خروج

و مزاجنا كان مزاج انطلاق

جو طالب حركات عيال

قعدنا نشتغل بعض طول الطريق

و لما جينا نطلع الكورنيش من أجمل مكان فيه اللى بعد قرية الكروان السياحية

شدنا اوى صوت ام كلثوم و هى بتجلجل فى المكان

الناس فى بورسعيد لسه عايشة الزمن الجميل

و طلعنا الكورنيش و على برده ساند عليا و نوفا

و بعدين بقى

المهم اول لما طلعنا قعدنا على الكورنيش

كانت طالبه معايا اوى احس بتشرد

كان نفسى اقعد على الارض

بس منفعش فيه ناس رايح و جايه مش نافع

المهم قعدت و استربعت على سور الكورنيش

و على كان عايز يلعب أأأأى

بس قال لا بلاش علشان ايدى تقيلة

هههههه

و زيفاجو طبعا بقفشاته قاله

طيب ما نلعب منديل بقى

المهم لعبت مع على و نوفا بوم

اللى هى تعد من ا لحد لما يجى رقم 5 و مشتقاته تقول بوم

المهم على قال 1 و انا 2 و نوفا 3 و زيفاجو قال بوم

على قال طيب نلعب احنا قال 1 قمت قولتله بوم

غلس مش كده

و اتمشينا بقى ع الكورنيش

و رحنا نغلس على اجتماع موقع رابطة النادى المصرى

و اتفقنا مع المصرى انه لما يخلص

هيكلمنا نقابله

المهم طلعنا من جوه

لقينا نوفا جايب فشار

و خمسنا فيه كلنا

الواد ده تعهد فشار

كل اسبوع طنط ربنا يديها الصحة

بتعملنا فشار

و الاسبوع ده نوفا هو اللى اشترى الفشار

تخصص كتاتنوية ههههه

و طبعا كل ده لا يخلو من التصرفات

الطفولية و الاشتغالاتية

المهم كالعادة تفاصيل و نوفا

طلبت معاهم قعدوا يجروا ورا بعض

( توم & جيرى بورسعيد )

و مشيت مع زيفاجو و قال أحلى كلام

ممكن تسمعه عن بورسعيد

تحياتى يا فنان

و رحنا عند امستردام

دى مش اللى فى هولندا

دى كافتيريا فى بلدنا

اخدنا المصرى

و كملنا نتمشى

و رجعنا من الطرح

و شفنا عريس و خاطبته

ماشين فى الشارع ماشى و الظاهر

ان حفلة خطوبتهم كانت النهاردة

شكلهم حلو و الاجمل انهم ماشين بحريتهم

قولنا عقبالنا .. الواحد ميكدبش

و مشينا نتكلم و نزق فى بعض

عيال بقى ملهمش حل

شقاوة و ضحك

و افتكرت زمان

هو مش زمان اوى

ده كان من كام سنة

كانت كل حياتى فسح و هزار و دلع

المهم على الألفى الهمام

موظف يا حرام

قال عايز اروح أنام

الساعة 12 بالتمام

و طلب رجاء اننا نوصله كمان

رحنا معاه يا جدعان

و لما وصلنا لتحت البيت

قال شايفين العربية دى

طبعا انا و نوفا عنينا راحت على المرسيدس

الجامدة اللى جنب عربيته

بس هو كان يقصد العربية بتاعته

هههههه

و سندنا عليها و قال الظريف تعالوا نلعب بوم

قولت و ماله

قال 1

و انا جنبه و الدور عليا 2 قمت قايل بوم

ههههه هى مرازية بقى

سابنا و طلع

و فضل دلوقتى مين موجود

قولوا معايا

العبد لله و نوفا و زيفاجو و المصرى

المصرى بقى نازل يتعشى و أنا بصراحة كنت جعان

و زيفاجو عايز يروح شغله

و نوفا شبعان

افترقنا مؤقتا

رحت مع المصرى لهاى بورجر

أكلنا و حصلنا نوفا على الفريبور

و هناك افترقنا

و فضل فى الاخر انا و نوفا

و كنا خلاص مفيش رجلين من كتر المشى و الجرى

و كان قدامنا معديتين

واحدة هتطلع و واحدة لسه قدامه كتير

و نوفا المسكين عايز ينام يا عينى

قررنا نجرى نحصل اللى هتطلع

و أنا اجرى و هو يجرى

و الحمد لله حصلناها

و نزلنا بورفؤاااااااد

و رحنا ع اللنش

و نوفا وصلنى

و شفقة بيه قولتله خلاص نزلنى هنا بلاش تدخل شارعى علشان تلف ع طول

الندل لما صدق وقف

و قولتله سلام

و سابنى الجبان

مش بقول خروجة عيال

ههههههه

كنت مبسوط باليوم

و يارب يتكرر علطول

=====

على فكرة كلام فى سركوا أنا نازل بحر بورفؤاد هسهر هناك

أنا و شله من الأصحاب

اللى عايز يجى ينورنا فى هذا المكان

الصور بالتدوينة للمصور : وليد منتصر

لكل مكان فى بورسعيد سحره صبحه و ليله

جمال على أصله

الرحلة من الساعة 9:15
1:50

بين نخلتين

بين نخلتين على شط بحرى

نسجت خيوط و عملت سرير

قولت استرخى شويه

و أتامل فى جمال الكون

و لأن الجو جنان

عينى غفلت يا جدعان

و ده خلانى زعلان

تفتكروا ليه ؟

لانى حلمت كتير احلام

حلمت انى صاحب المكان

و النخلتين خدام

و حياتى كلها أنغام

و حلمت بيها

حورعين

زوجة فى الدنيا

و ليه مش ممكن

ايدي فى ايدها

ندخل الجنة بحبنا لبعض فى الله

و حلمت انى بحكم البلاد من الشرق للغرب

و بمشى وسط الناس فى عز الضهر من غير حراس

و لا كرابيج

و حلمت ان اصحابى كل واحد فى مجاله عظيم

و شفت ولادى صالحين بيدعولى

سامعهم بيقولوا الله يرحمه عرف يربينا

و شفت جنازتى و الناس بتودعنى

و الحزن فى قلوبهم قد العين

و سمعت العالم بيحكى قصصى

و بيتى فيلا

فى قلب البلد

بقت متحف

مليان قصاقيص ورق

بتحكى امالى و احلامى

حتى آلامى

و نضارتى و الام بى 3 بتاعى

شايفهم بعينى هناك

و صحيت من الحلم على صوت

كروان

بحب صوتك بس مش وقتك

تصحينى من احلامى و لسه

قدامى كام حلم و كام سؤال

عايز اعرفهم

شفت الشريط بس ناقصه احداث

هسيبك يا زمان تكملها لى

بس بلاش من الاحزان

و يارب تكون الاحلام دى مش اوهام

لانها كلها فى طريق رضاك

زعلت لانى صحيت

لقيتنى فى الواقع مفيش جديد

و لسه فى أول الطريق

يارب هون و سهل المشوار

=====

نفسى اعيش يوم بالشكل ده على شط البحر

لمتابعة الحملة

أخى المدون

تحياتى لك و ارجو انت تكون ايجابى معانا

فى حملة مدونى بورسعيد للتضامن و المساعدة

مع ضحايا حادث الاتوبيس

و لمتابعة خطة الدعم و التضامن زورا مدونتنا

http://portsa3ed.blogspot.com/

تابع نداء إلى مدونى القاهرة

و برنامج الحملة يومى الاربعاء و الخميس

خليك معانا

مش لاقيين كلام نقوله من شدة الحزن
لا إله إلا الله
و إنا لله و إنا إليه راجعون
بس اللى حصل خلانا لازم نتكلم
لازم كمدونين البلد دى
نقف ايدينا فى ايد بعض فى محن بلدنا
و ولاد بلدنا
اللى حصل كان صعب اوى
كان قاسى اوى
=======
الحادثة
الاتوبيس358البحر الاحمر
تابع لشركة " انتر جولف للسياحة
كان فى طريق عودته بشباب بورسعيد
لحضن بلدهم بورسعيد
لكن القدر و امر الله طبعا
و رعونة و استهتار بارواح ابرياء
منعهم من الحصول على اخر امانيهم فى الحياة الدنيا
بس ان شاء الله هيحققوا كل امانيهم فى الحياة الاخرة
لما كان كل حلمهم فى اللحظات دى
انهم يلاقوا اهاليهم فى انتظارهم فور دخولهم بورسعيد
وجدوا فعلا اهالي بورسعيد كلهم ينتظروهم
ليودعوهم لمثواهم الاخير
نعم اهالى بورسعيد اهاليكم
كلها تبكيكم
و ناخد العزاء فيكم
و ننتظر الصبر عن مصيبتنا
وداعا اخواتنا فى بورسعيد
اهالينا اسر الشهداء
فقد مات ابنائكم شهداء
و لكن الآن لكم آلاف الابناء
فهل تقبلوننا ابناء لكم
نعلم اننا مهما قلنا لم نستطيع ان ننسيكم آلامكم و آلامنا
و حزنكم و احزاننا على فراق احبابكم و احبابنا
و اصدقائكم و اصدقائنا
و لكننا نعلم ان الايمان بالله عامر فى قلوبكم
فلنصبر و لنحتسب
======
اخوانى مدونى بورسعيد فى مدونتنا
نعلن مبادرة مدونى بورسعيد
للتضامن مع اسر الضحايا و المصابين و طلاب كلية تربية نوعية
فى مصابهم و مصابنا الأليم
قررنا نحن مدونى بورسعيد أن
يكون لنا دور ايجابيا فى هذه المأساة
اكيد فى حاجات محتاجنها للمصابين
اكيد عايزين دم
اكيد زمايلهم محتاجين دعم معنوى
لازم نكون اقرب من الحدث علشان نعرف اكتر
ممكن نعمل ايه
الاول احنا هنسأل على موضوع حاجة المصابين للدم دى
هننزل الكلية للطلبة و نحاول نكون جنبهم
ساعدونا بالمعلومات
اللى ممكن من خلالها نساعد و لو بحاجة بسيطة
احنا هنستقبل أى اقتراحات من اى مودن فى مصر كلها
او فى أى حتى فى العالم
من اى انسان عايز يكون معانا فى العمل ده
فكر معانا
دى اقتراحات اللى اتعرضت دى
و متروكة للنقاش
======
ينعى مدونى بورسعيد
اخوانهم من أبناء بورسعيد الذين
راحوا ضحايا لحادث أليم
و يدعون الله لهم بالرحمة و المغفرة
و لاسرهم الصبر و السلوان
و نعلن الحداد فى مدوناتنا لمدة أسبوع
و إنا لله و إنا إليه راجعون
======
للتواصل معانا بالافكار
عن طريق الكومنتات فى البلوج

http://www.portsa3ed.blogspot.com/
او الايميل
portsa3ed@hotmail.com
ولمتابعة تفاصيل الحادث
زورا موقع
www.4portsaid.com

و لانى مدون من مدونى بورسعيد و من الناس اللى متأثرة بالحادث
ادعوكم جميعا للمشاركة فى هذه الحملة
و فى انتظار تواصلكم معها

رحلة راحة

الاسبوع ده كان برغم الاحداث اللى مريت بيها
كان اسبوع من الاسابيع الجميلة فى حياتى
بدأ يوم الجمعة بتجمع و لا اجمل و لا احلى
بجد حسيت بعده براحة نفسية جميلة
======
و بعدين جاتلى دعوة جميلة فى خالد اكزوتك ماتر
اللى مسجل مدونته عندى باسم فلكاوى
علشان اصاحبه فى رحلة نشوف فيها
جمال الكون
المهم اللى شوفته مخلينى اردد
لحد دلوقتى
سبحان الله
سبحان الله
سبحان الله
على فكرة انا شفت منظر شبه الصورة دى بالظبط
بجد بجد
يا سبحان ربى العظيم
سبحان ربى العظيم
شكرا خالد
اخيرا شفت التناسق الرهيب بنفسى :)
=======
المهم
النهاردة هعمل حاجة جديدة جدا
حاجة بسميها جلسة راحة
كنت بعملها من فترة على البحر بعد 12 بليل
بس ممكن تعملها فى الاوضة بتاعتك فى البيت
المطلوب
اطفى النور خالص
استرخى على الارض
اه على الارض اسمع كلامى بس
هتدعيلى و الله
و شغل سورة الشعراء و سورة الرحمن على الترتيب
بصوت مشارى راشد
لازم الترتيب و لازم صوت مشارى
اه لازم
بس بشرط انك تفضى دماغك و تبقى صافى الذهن
هتحس بعد الجلسة دى انك مولود من جديد
بس اوعى تفكر فى حاجة خالص و انت فى الجلسة مش هيبقى ليها لزمة
الجلسة دى متجربة و مريحة جدا جدا للنفس

مش ممكن يحصل ؟

اللى بكتبه ده رأيى شخصى للنقاش

طبعا لما تبص للصورة علطول هتقول

مش ممكن تحصل دى خدعة

بس لما شوفتها

سألت نفسى سؤال

هو اللى فى الصورة ده ممكن يحصل !!!!

اوعى ترفع حاجبك و اسمعنى للاخر

انا اقصد هل من الممكن ان الانسان يعيش بكل نص لوحده

مش بالشكل اللى فى الصورة طبعا

هل من الممكن ان الانسان عقله يعيش فى سكه و قلبه يعيش فى سكه

هل ممكن الانسان يعيش بشخصية للناس و شخصية ليه هو

اسئلة كتيرة دارت فى دماغى

و اتهامات كتير شفتها بعينى لاشخاص

دايما الناس تنظر للشخص الهادى ان مش ممكن يكون الانسان هادى كده

و كمان مش كده ده الناس بتسئ الظن فى الشخص ده

و دايما ينظروا له انه فيه حاجات كتيرة من شخصية مستخبية

و بيستنوا انها الاسوأ فى حين انها ممكن تكون احسن من الجوانب الظاهرة للشخصية

و ده خلانى اقول ان الصورة و رغم صعوبة تحقيق الشكل ده

و لكن لو اتحققت مش ممكن يستمر عليها الانسان

و ده بيوصلنى لنتيجة اهم ان الانسان مش ممكن يعيش بكل نص لوحده

و كمان مهما كانت براعته فى التلون و التخفى و لبس الاقنعة

لا يستطيع ان يخفى حقيقة شخصيته اكثر من ساعات قليلة عن المحيطين

حتى و لو طالت لشهور بتفرق تبع ذكاء المتعاملين معاه

الموضوع للدردشة و الكلام فيه حتى نقد التصور الشخصى بتاعى متاح جدا

========

اوريك هعمل ايه يا بهجت

هقسمك نصين من هنا

نصين !!!

من هناهو

طيب اجوز ازاى انا بقى

برضه ده اللى افتكرته اول لما شفت الصورة دى

ههههه

عندما تكون سعيد و حزين فى آن واحد

كثيرا ما يتوقف الانسان عند المتناقضات

و يقف امامها متحيرا

فالاصل اننا دايما نستبعد اجتماع الامر و ضده فى آن واحد

و أنا من ضمن اللى دايما بيشوفوا ان مش مستحيل ان الامر و ضده يجتمعان

تمام

المهم ناس كتير

بتشوف ان الانسان صعب يكون سعيد و حزين فى نفس الوقت

بس من تجاربى الشخصية ان ده ممكن

و دلوقتى انا بتكلم من وحى تجربة شخصية عايشها تلك الايام

نبدأ باحساس الحزن : الاحساس ده اصلا ملازمنى من فترة تقدر بشهرين ألا حاجة بسيطة

و لاسباب شخصية مش هقدر اتكلم عنها و ده يمكن من اسباب استمرار حالة الحزن دى انى مش قادر اتكلم فيها علشان اقيمها

فى نفس الوقت فى حلم حلمته من وقت لما كنت صغير اصبحت على بعد خطوات صغيرة من تحقيقه

و فيه حلم جماعى اكبر كمان فى الطريق للتحقيق

سعادتى لا توصف بانى انهى حالة البيات الشتوى و اللى بنهايتها هتلاقونى انسان جديد

كله نشاط و حماس و ابداع قولوا يارب ارجع زى ما كنت زمان

و ده طبعا معيشنى فى سعادة تحقيق الاحلام

دى احلى سعادة

و فى كمان حلم لمجموعتى غير الحلم المنتظر ده

يتم الاعداد ليه

و فى وسط مزيج السعادة و الحزن ده

و ان كانت السعادة هى دائما الاحساس الظاهر

انتابنى اليوم احساس شديد بالضيق

الايام القادمة المفترض هتكون معسكر مغلق للحلم بتاعنا الاول

أيام بلا نوم بلا راحة و دى ضريبة تحقيق الاحلام

و مفيش مانع عندى ان اسهر الايام دى

و طبعا الفريق بدأ الحماس عنده يعلى فى السما و ده فرصة لا تعوض

و لكن منعت من النزول من البيت لمدة 4 أيام بأمر الطبيب :(

المهم طبعا الموضوع ده مضايقنى جدا لانى عايز اتابع مع اخواتى حلمنا

اخيرا كلامى لاصدقائى شركاء الحلم

فاضل خطوات قليلة علشان نشوف حلم من احلامنا الكتير حقيقة

و ده خطوة من خطوات طريقنا

عايزين نركز أكتر .. عايزين نكون جد اكتر

تحويل الحلم للواقع مش ببلاش .. ده بمجهود و تعب

و ادها و قدود باذن الله

و لنبقى طول العمر

شركاء .. فى صنع المستقبل

و كلها كام يوم و سأعوددددددددد

عندى امل كبير فى ان الحلم ده يدينى السعادة و ينسينى احساس الحزن اللى جوايا

فضفضة

=============

كلنا ايد واحدة ياريس.. كلنا بنكمل بعض

قالها شباب مدرسة المشاغبين .. عاشها شباب شركاء